WALTAJJII WALOO MMWO FI KOREE DHAABBII CAFFEE OROMIYAA

*Waltajjii Marii Hooggansa MMWO fi Koree Dhaabbii Dhimma Bulchiinsaa, Seeraa fi Qabeenya Namaa Caffee Oromiyaa*

Koreen Dhaabbii Dhimma Bulchiinsaa, Seeraa fi Qabeenya Namaa Caffee Oromiyaa Walittiqabaa Korichaa, Kab. Obbo Naasir Huseeniin durfamuun rifoormii Mana Murtii Waliigalaa Oromiyaa tti gaggeeffamaa jiru Amajjii 12 bara 2014 daawwateera. Sadarkaa ijaarsi gamoo Waajjira Muummee Mana Murtichaa irra jirus Caffee Araaraatti argamuun ilaaleera. Sana boodas waltajjiin marii waloo gaggeeffameera.

Waltajjicha irrattI haasaa baga nagaan dhuftanii kan taasisan Pirezidaantiin MMWO, Kab. Obbo Gazaalii A/Simal “qaamni itti waamamnu Caffeen Oromiyaa karaa Korichaan rifoormii gaggeessaa jirruu fi hojiiwwan hojjachaa jirru daawwachuun isaa maaltu akka deemaa jiru hubachuuf kan gargaaruudha” jedhaniiru.

*Kab. Obbo Gazaalii A/Simal, Pirezidaantii MMWO*

Waltajjicha irratti barreeffamni gabaabaan rifoormii Manneen Murtii Oromiyaa irratti xiyyeeffate karaa Daayireektara Dhimmoota Komunikeeshinii MMWO, Obbo Gonfaa Atoomaatiin kan dhiyaate yoo ta’u bu’aa rifoormiin kun Kenniinsa Tajaajila Abbaa Seerummaa (KTAS) irratti fide kan xinxaalu barreeffamni biroon karaa Qindeessaa Deeggarsa Hojii Dhaddachaa MMWO, Obbo Joonii Bantiin dhiyaateera. Kana malees, yaadama dizaayinii fi haala waliigala ijaarsa gamoo Waajjira Muummee MMWO irratti dhiyeessii gabaabaan Obbo Naahom Dabaloo, manaajara ijaarsichaan dhiyaateera.

*Obbo Gonfaa Atoomaa, Daayireektara Dhimmoota Komunikeeshinii MMWO*

*Obbo Joonii Bantii, Qindeessaa Deeggarsa Hojii Dhaddachaa MMWO*

Sana boodas marii Pirezidaantii MMWO, Kab. Obbo Gazaalii A/Simal fi Walittiqabaa Koree Dhabbichaa, Kab. Obbo Naasir Huseeniin hoogganame irratti miseensonni korichaa hordoffii hojii dirree MMA fi MMO irratti godhanii fi daawwannaa guyyaa har’aa taasisan irratti hundaa’uun yaadota gurguddoo kaasaniiru. Yaadota ka’an keessaa muraasni rifoormiin Manneen Murtii Oromiyaa gaggeessaa jiranii (keessumattuu itti fayyadamni TQO) fi hojiiwwan hojjatamaa jiran qaamolee biroof fakkeenya akka ta’u; komiin kana dura Manneen Murtii irra ture daraan xiqqaachuu; rifoormiin gaggeeffamaa jiru bakka hundatti wal fakkaachuu akka qabu; Manneen Murtii jalaa (keessumattuu Manneen Murtii Aanaalee) tajaajila kennaniin komii hawaasaa amma jiru hambisuu/xiqqeessuuf cimanii hojjachuu kan qaban ta’uu; ijaarsi gamoo MMWO gaggeeffamaa jiru Mana Murtichaarra darbee akka sabaatti kan hunda bakka bu’u ta’uu fi hordoffiin isaa sadarkuma kanaan cimuu kan qabu ta’uu fi akka waliigalaatti hojii boonsaa Manni Murtichaa itti jiruuf gammachuu guddaa kan qaban ta’uu ibsaniiru.

Pirezidaantiin MMWO, Kab. Obbo Gazaalii A/Simal goolaba waltajjichaa irratti yaada kennaniin yaada miseensonni korichaa kennan akka galteetti fudhannee irratti hojjanna jedhaniiru.

•••

DAAYIREKTOREETII DHIMMOOTA KOMUNIKEESHINII MMWO

Argama

Sa'aatii Hojii

WALTAJJII WALOO MMWO FI KOREE DHAABBII CAFFEE OROMIYAA